ਮੇਰੇ ਦਾਦੇ ਦੇ ਜਨਮ ਵੇਲੇ
ਤੂੰ ਬਾਰਾਂ ਵਰਿਆਂ ਦਾ ਸੀ
ਜੱਲਿਆ ਵਾਲੇ ਬਾਗ ਦੀ ਮਿੱਟੀ ਨਮਸ਼ਕਾਰਦਾ
ਦਾਦਾ ਬਾਰਾਂ ਵਰਿਆਂ ਦਾ ਹੋਇਆ
ਤੂੰ ਚੌਵੀ ਸਾਲਾਂ ਦਾ
ਭਰ ਜਵਾਨ ਗੱਭਰੂ ਸੀ
ਤੇਰਾ ਸ਼ਹੀਦੀ ਵੇਲਾ ਸੀ
ਦਾਦਾ ਗੱਭਰੂ ਹੋਇਆ ਤਦ ਵੀ ਤੂੰ
ਤੂੰ ਚੌਵੀ ਸਾਲਾਂ ਦਾ ਭਰ ਜਵਾਨ ਸੀ
ਮੇਰੇ ਪਿਤਾ ਦੇ ਗੱਭਰੂ ਹੋਣ ਵੇਲੇ ਵੀ
ਤੂੰ ਚੌਵੀ ਸਾਲਾਂ ਦਾ ਭਰ ਜਵਾਨ ਸੀ
ਮੈਂ ਚੌਵੀ ਸਾਲਾਂ ਦਾ ਹੋਇਆ
ਤਾਂ ਵੀ ਤੂੰ ਚੌਵੀ ਸਾਲਾਂ ਦਾ ਭਰ
ਜਵਾਨ ਗੱਭਰੂ ਸੀ
ਮੈਂ ਹਰ ਜਨਮਦਿਨ ਤੇ
ਬੁਢਾਪੇ ਵੱਲ ਇੱਕ ਸਾਲ ਵੱਧਦਾ ਹਾਂ
ਤੂੰ ਹਰ ਸ਼ਹੀਦੀ ਦਿਨ ਤੇ
ਚੌਵੀ ਸਾਲਾਂ ਦਾ
ਭਰ ਜਵਾਨ ਗੱਭਰੂ ਹੁੰਦਾ ਹੈਂ
ਉਂਝ ਅਸ਼ੀਸ ਤਾਂ
ਸਾਰੀਆਂ ਮਾਵਾਂ ਦਿੰਦੀਆਂ ਨੇ
ਸਦਾ ਜਵਾਨੀਆਂ ਮਾਣੇਂ
ਪਰ ਤੂੰ ਸੱਚਮੁੱਚ ਜਿੰਦਾ ਹੈਂ
…….ਭਰ ਜਵਾਨ ਗੱਭਰੂ
ਸਦਾ ਜਵਾਨੀਆਂ ਮਾਣਦਾ
ਜਿਹਨਾਂ ਅਜੇ ਪੈਦਾ ਹੋਣਾ ਹੈ
ਉਨਾਂ ਗੱਭਰੂਆਂ ਦੇ
ਵੀ ਹਾਣ ਦਾ ਹੈਂ
